حیدرآباد (دکن فائلز) پاکستان نے نیدرلینڈز کو 81 رنز سے شکست دیکر ورلڈ کپ کا فاتحانہ آغاز کیا ہے۔ حیدرآباد کے راجیو گاندھی اسٹیڈیم میں کھیلے گئے ورلڈ کپ کے دوسرے میچ میں نیدر لینڈز کی ٹیم 41 اوورز میں 205 رنز بنا کر آؤٹ ہوگئی۔ نیدرلینڈز کی جانب سے بیس ڈی لیڈے اور وکرم جیت سنگھ بالترتیب 67 اور 52 رنز بنا کر نمایاں رہے۔ لوگن وین بِیک 28 رنز بنا کر ناٹ آؤٹ رہے۔
پاکستان کی جانب سے حارث رؤف نے 3، حسن علی نے 2 جبکہ شاہین شاہ آفریدی، محمد نواز، شاداب خان اور افتخار احمد نے ایک ایک وکٹ حاصل کی۔
قبل ازیں پاکستانی ٹیم نے نیدرلینڈز کی دعوت پر پہلے بیٹنگ کرتے ہوئے 49 اوورز میں 286 رنز بنا کر آؤٹ ہوگئی تھی۔ پاکستان کی جانب سے اوپنر فخر زمان ناکام ثابت ہوئے اور 12 کے انفرادی اسکور پر پویلین لوٹ گئے۔ کپتان بابراعظم نے 15 گیندوں محض 5 رنز بناکر ایک بار پھر آف اسپنر کا شکار بنے جبکہ امام الحق 15 رنز بناکر آؤٹ ہوئے۔
مڈل آرڈر میں سعود شکیل نے شاندار کھیل کا مظاہرہ کرتے ہوئے پاک ٹیم کا سہارا بنے اور وکٹ کیپر محمد رضوان کے ساتھ 124 رنز کی پارٹنرشپ قائم کی۔ بعدازاں سعود شکیل اور محمد رضوان 68، 68 رنز بناکر آؤٹ ہوئے جبکہ افتخار احمد 9 رنز کے مہمان ثابہت ہوئے۔ شاداب خان اور محمد نواز نے ٹیم کو سہارا دیتے ہوئے 62 رنز کی پارٹنرشپ قائم کی، شاداب 32، نواز 39، حارث رؤف 16 جبکہ حسن علی صفر پر وکٹ گنوابیٹھے۔
نیدرلینڈز کی جانب باس ڈی لیڈز نے 4، کولن ایکرمین نے 2 جبکہ وین بیک، پال وین میکرین اور آرین دت نے ایک ایک وکٹ حاصل کی۔
