حیدرآباد (دکن فائلز) کرکٹ میچ کے دوران ایک کرکٹر پچ پر دل کا دورہ پڑنے سے چل بسا جس کی ویڈیو وائرل ہوگئی۔ میڈیا رپورٹس کے مطابق 34 سالہ وکاس نیگی اترپردیش کے شہر نوئیڈا میں مقامی سطح پر کھیلے جانے والے میچ کے دوران بیٹنگ کیلئے پچ پر موجود تھے۔
ویڈیو میں وکاس نیگی کو ساتھی کھلاڑی امیش کمار کے چوکا لگانے کے بعد ان کی حوصلہ افزائی کرنے کیلئے آگے بڑھتے دیکھا گیا۔ ویڈیو میں دیکھا جاسکتا ہے کہ وکاس جیسے ہی امیش کمار کے پاس پہنچے تو درد کی شدت کے باعث نیچے زمین پر گرگئے جس کے بعد ٹیم کے دیگر کھلاڑیوں نے وکاس کو چاروں طرف سے گھیر لیا اور پھر طبی ٹیم بھی گراؤنڈ میں پہنچ گئی جس کی مدد سے وکاس کو گراؤنڈ سے باہر لے جایا گیا۔
بتایا جارہا ہے کہ اس کے بعد وکاس کو نوئیڈا کے قریبی اسپتال میں لے جایا گیا جہاں ڈاکٹرز نے ان کی جان بچانے کی کوشش کی تاہم وہ جانبر نہ ہوسکے۔ میڈیا رپورٹس کے مطابق اپنی موت سے قبل نیگی نے میچ کے دوران بیٹنگ کرتے ہوئے 6 گیندوں پر7 رنز بنائے تھے۔
