حیدرآباد (دکن فائلز) آندھراپردیش کے سریکاکولم ضلع میں ایک خوفناک حادثہ پیش آیا ہے۔ کاسی بوگا کے سری وینکٹیشور سوامی مندر میں ہفتہ کو بھگدڑ مچنے سے 10 عقیدتمند ہلاک ہوگئے۔ حادثہ میں کئی افراد شدید زخمی ہو گئے۔ یہ حادثہ ایکادشی کے موقع پر مندر میں عقیدت مندوں کی بڑی تعداد کی وجہ سے پیش آیا۔
وینکٹیشور سوامی کے درشن کرنے کے لیے ہزاروں عقیدت مند کاسی بوگا مندر پہنچے تھے۔ بھیڑ اچانک بڑھنے سے بھگدڑ مچ گئی۔کچھ لوگ دم گھٹنے کی وجہ سے موقع پر ہی دم توڑ گئے۔
چیف منسٹر چندرابابو نائیڈو نے اس المناک واقعہ پر گہرے صدمے کا اظہار کیا۔ انہوں نے مرنے والوں کے اہل خانہ سے اپنی گہری تعزیت کا اظہار کیا۔
اس وقت جائے وقوعہ پر امدادی کارروائیاں جاری ہیں۔ زخمیوں کو علاج کے لیے قریبی اسپتالوں میں منتقل کیا جا رہا ہے۔ حکام نے خدشہ ظاہر کیا ہے کہ ہلاکتوں کی تعداد میں مزید اضافہ ہو سکتا ہے۔
