حیدرآباد (دکن فائلز) لوک سبھا میں اپوزیشن کے لیڈر راہول گاندھی نے آج بالآخر ہائیڈروجن بم دھماکہ کر ہی دیا، جس میں کئی دھماکہ خیز انکشافات ہوئے ہیں۔ انہوں نے ایک مرتبہ پھر پاور پوائنٹ پریزنٹیشن کے ذریعہ ووٹر لسٹ میں خامیوں اور کئی دھاندیوں سے واقف کروایا۔
راہول گاندھی نے سنگین الزام لگایا کہ گزشتہ سال ہریانہ اسمبلی انتخابات میں بڑے پیمانے پر ووٹ چوری ہوئے ہیں۔ انہوں نے الزام لگایا کہ ہریانہ میں 25 لاکھ ووٹ چوری ہوئے جس میں کل 2 کروڑ ووٹر ہیں۔ “اس کا مطلب ہے کہ ہریانہ میں آٹھ میں سے ایک ووٹرس جعلی ہے، جو 12.5 فیصد ہوتے ہیں۔
راہول گاندھی نے کہا کہ کانگریس کے کئی امیدواروں نے الیکشن کے بعد انہیں بتایا کہ کچھ غلط ہوا ہے۔ انہوں نے کہا کہ تمام ایگزٹ پولز نے ہریانہ کے انتخابات میں کانگریس کی جیت کی پیش گوئی کی تھی، لیکن نتائج نے بی جے پی کو جتوا دیا۔ انہوں نے بی جے پی لیڈر اور وزیر اعلیٰ نایاب سنگھ سینی کا ایک ویڈیو بھی دکھایا، جس نے نتائج سے پہلے میڈیا کو بتایا کہ “انتظامات” کر لیے گئے ہیں اور بی جے پی انتخابات جیت رہی ہے۔ انہوں نے سوال کیا کہ “یہ کیا انتظامات تھے؟ یہ انتخابات کے دو دن بعد کی بات ہے جب ہر پارٹی کہہ رہی ہے کہ کانگریس پارٹی الیکشن میں کلین سویپ کر رہی ہے، لیکن بات چیت میں پورے یقین کا اظہار کیا گیا اور خوشی سے بتایا گیا کہ بی جے پی نے انتظامات کر لیے ہیں۔”
انہوں نے یہ بھی کہا کہ ہریانہ کی تاریخ میں پہلی بار ایسا ہوا ہے کہ پوسٹل ووٹنگ کا نتیجہ پولنگ بوتھوں کے نتائج کے برعکس تھا۔ انہوں نے کہاکہ “میں الیکشن کمیشن اور ہندوستان میں جمہوری عمل پر سوال اٹھا رہا ہوں اور میں ایسا 100 فیصد ثبوت کے ساتھ کر رہا ہوں۔ ہمیں یقین ہے کہ کانگریس کی بھاری جیت کو ہار میں تبدیل کرنے کے لیے ایک منصوبہ تیار کیا گیا تھا۔”
کانگریس لیڈر نے کہا کہ کانگریس نے بہت ہی کم فرق سے آٹھ حلقے ہارے، جن میں سے ایک میں صرف 32 ووٹوں سے جیت کو ہار میں بدلا گیا۔ انہوں نے سنگین الزامات کو صحیح ثابت کرنے کےلئے متعد مثالیں بھی پیش کیں۔ انہوں نے ہریانہ کی ووٹر لسٹ بتاتے ہوئے انکشاف کیا کہ ایک خاتون کی تصویر کے ساتھ 22 اندراجات موجود ہیں۔ انہوں نے کہا کہ یہ برازیلی ماڈل کی تصویر ہے۔ تصویر کو ویب سائٹ سے ڈاؤن لوڈ کیا گیا۔ کانگریس لیڈر نے کہا کہ اس برازیلی خاتون کی تصویر ووٹر لسٹ میں 22 بار مختلف ناموں سے ظاہر ہوتی ہے، ’سویٹی، سیما، سرسوتی‘ و دیگر۔۔۔
انہوں نے کہا کہ “وہ ہریانہ میں 10 مختلف بوتھوں پر ووٹ ڈالتی ہیں اور اس کے متعدد نام ہیں۔” اسی طرح کے ایک اور ووٹ چوری کے معاملہ پر بات کرتے ہوئے راہول گاندھی نے کہا کہ ’ایک ہی اسمبلی حلقہ میں ایک ہی خاتون کی تصویر کے ساتھ 100 ووٹر آئی ڈی بنے ہیں۔ گاندھی نے کہاکہ “یہ خاتون ہریانہ میں 100 بار ووٹ ڈالتی ہے۔انہوں نے الزام عائد کیا کہ ایسا کرنے کی وجہ یہ ہے کہ بی جے پی کے لوگ دوسری ریاستوں سے آکر ووٹ ڈال سکیں۔”
اسی طرح راہول گاندھی نے ایک اور خاتون کی تصویر دکھائی جو دو پولنگ بوتھوں کی ووٹر لسٹ میں 223 بار دکھائی دیتی ہے۔ انہوں نے الزام لگایا کہ یہی وجہ ہے کہ الیکشن کمیشن بوتھوں کے سی سی ٹی وی فوٹیج کو منظر عام پر نہیں لاتا۔ انہوں نے الیکشن کمیشن پر بی جے پی کی مدد کرنے کا بھی الزام عائد کیا۔ انہوں نے اس طرح کی متعدد مثالیں پیش کیں۔
راہول گاندھی نے یہ بھی دعویٰ کیا کہ انتخابات سے پہلے ہریانہ کی ووٹر لسٹ سے 3.5 لاکھ نامو کو حذف کردیا گیا تھا۔ راہول گاندھی نے کہا کہ الیکشن کمیشن کی مدد سے ہر بار بی جے پی جیت جاتا ہے۔
