حیدرآباد (دکن فائلز) مرکزی انجمنِ قادریہ کی 63ویں تاریخی اور فقیدالمثال دینی تعلیمی ریلی کا 30 نومبر 2025 بروز اتوار صبح 10 بجے مکہ مسجد، چارمینار سے شاندار آغاز ہوگا۔ اس عظیم الشان ریلی کا افتتاح معروف عالمِ دین حضرت مولانا سید محمود صفی اللہ حسینی وقار پاشاہ صاحب کریں گے جبکہ صدارت حضرت مولانا سید شاہ غلام صمدانی علی قادری صاحب، صدر مرکزی انجمنِ قادریہ، کے ذمہ ہوگی۔
ہر سال کی طرح اس مرتبہ بھی ہزاروں طلبا، طالبات، اساتذہ اور نوجوانوں کی شرکت متوقع ہے اور انجمن نے خصوصاً تمام اسکولوں، مدارس اور نوجوانوں سے بھرپور شرکت کی اپیل کی ہے تاکہ دینی تعلیم کے فروغ اور اسلامی اقدار کی اشاعت کے اس بامقصد مشن کو مزید تقویت مل سکے۔
انجمنِ قادریہ گزشتہ 70 برسوں سے دینی تعلیم کے فروغ، نوجوانوں میں اسلامی شعور بیدار کرنے، کردار سازی، اخلاقی تربیت اور دین کے عملی تقاضوں سے آگہی فراہم کرنے کے مشن پر گامزن ہے۔
دینی تعلیمی ریلی کا مقصد:
* طلبا و نوجوانوں میں دین سے محبت اور شعور پیدا کرنا
* دینی تعلیم کے فروغ کی اہمیت کو اجاگر کرنا
* معاشرے میں امن، اخلاق اور اتحاد کا پیغام عام کرنا
* والدین، اساتذہ اور سماج کو دینی تربیت کی جانب راغب کرنا
ریلی کے انتظامات جناب میر ذوالفقار علی صاحب، مولانا قطب حسینی فاطمی (معتمد عمومی مرکزی انجمن قادریہ) اور جناب مرزا رحمت بیک صاحب کی نگرانی میں حتمی مراحل میں ہیں۔ جناب میر ذوالفقار علی صاحب نے یقین دہانی کروائی کہ اس سال انتظامات مزید بہتر اور منظم ہوں گے۔ انہوں نے کہا کہ “مجھے اللہ نے بامقصد مشن کی خدمت کے لیے منتخب کیا ہے، اور دینی تعلیم کی اشاعت ہم سب کی مشترکہ ذمہ داری ہے۔”
مرکزی انجمنِ قادریہ نے ایک بار پھر تمام مسلمانوں، خصوصاً اسکولوں، مدارس، علماء، اساتذہ، نوجوانوں، طلبا و طالبات سے پرجوش اپیل کی ہے کہ 30 نومبر کو مکہ مسجد سے نکلنے والی اس عظیم دینی تعلیمی ریلی میں بھرپور شرکت کریں اور دینی تعلیم کے فروغ میں اپنا حصہ ادا کریں۔ یہ ریلی نہ صرف ایک روایتی اجتماع بلکہ دینی بیداری، اتحاد اور شعور کا عظیم پیغام ہے۔
