حیدرآباد (دکن فائلز) مالی مشکلات سے دوچار، اپنی بہنوں کی شادیوں کے اخراجات کے بارے میں فکر مند مدھیہ پردیش کے پنا ضلع کے دو نوجوانوں کی قسمت ایک ہی رات میں پلٹ گئی۔ لیز پر لی گئی چھوٹی سی کان میں جاری کھدائی کے دوران انہیں 50 لاکھ روپے مالیت کا نایاب اور اعلیٰ معیار کا ہیرا ملا، جس نے ان کی زندگی میں خوشی کی نئی امید جگا دی۔
پنا کے رانج علاقے سے تعلق رکھنے والے 24 سالہ ستییش کھاتک، جو پیشے سے قصاب ہیں، اور 23 سالہ ساجِد محمد، جو پھل فروشی کرتے ہیں، غریب گھرانوں سے تعلق رکھتے ہیں۔ محدود وسائل کے باوجود انہوں نے قسمت آزمانے کا فیصلہ کرتے ہوئے تقریباً 20 روز قبل ایک چھوٹی کان لیز پر حاصل کی اور کھدائی کا کام شروع کیا۔ دلچسپ بات یہ ہے کہ ساجِد کے والد اور دادا بھی ماضی میں ہیروں کی تلاش کر چکے تھے مگر انہیں کوئی خاص کامیابی نہیں ملی تھی۔
لیکن اس بار قسمت نے دونوں دوستوں کا ساتھ دیا۔ کان میں کھدائی کے دوران ان کی نظر ایک چمکدار پتھر پر پڑی۔ فوراً ہی اسے محکمۂ کانکنی کے مقامی ڈائمنڈ افسر کے حوالے کردیا گیا۔ معائنے کے بعد افسران نے تصدیق کی کہ یہ 15.34 کیرٹ اعلیٰ درجے کا ہیرا ہے، جس کی قیمت مارکیٹ میں تقریباً 50 لاکھ روپے تک ہوسکتی ہے۔ حکام نے بتایا کہ اس ہیرے کی سرکاری نیلامی جلد منعقد کی جائے گی۔
ہیرے کی دریافت سے قبل ہی دونوں نوجوانوں نے فیصلہ کر رکھا تھا کہ جو بھی رقم حاصل ہوگی وہ اسے برابر برابر تقسیم کریں گے۔ ستییش اور ساجِد کا کہنا ہے کہ سب سے پہلے وہ اس پیسے سے اپنی بہنوں کی شادیاں عزت و احترام سے کریں گے، جبکہ باقی رقم سے کوئی چھوٹا کاروبار شروع کرکے اپنی زندگی بہتر بنانے کا ارادہ رکھتے ہیں۔
غریبی اور جدوجہد کے درمیان ان دو دوستوں کو ملنے والی یہ غیر معمولی کامیابی نہ صرف ان کی زندگی میں خوشیاں لے آئی ہے بلکہ ان کے حوصلے بھی بلند کر گئی ہے۔
