حیدرآباد (دکن فائلز) اتراکھنڈ کے شہر رودرا پور میں ایک بزرگ مسلم شخص پر مبینہ طور پر اس وقت تشدد کیا گیا جب وہ رمضان کے دوران ایک خالی جگہ پر نماز ادا کر رہے تھے۔ پولیس کے مطابق واقعہ جگت پورہ علاقے میں پیش آیا اور اس کی ویڈیو سوشل میڈیا پر گردش کر رہی ہے۔
متاثرہ شخص، شاہد نامی شہری، جو ریشم باڑی علاقہ کے رہائشی ہیں، نے بتایا کہ وہ گزشتہ کئی دنوں سے قریبی مقام پر کام کر رہے تھے اور جس جگہ انہوں نے نماز ادا کی وہ مندر کی عمارت سے کافی فاصلے پر واقع تھی۔ ویڈیو میں مبینہ شدت پسند درندے کو لاٹھیوں سے تشدد کرتے اور گالیاں دیتے ہوئے دیکھا جا سکتا ہے۔ الزام ہے کہ حملہ آوروں نے بزرگ شخص کو جے ایس آر کے نعرے لگانے پر بھی مجبور کیا۔
مقامی مسلم کمیونٹی کے افراد شاہد کو لے کر تھانے پہنچے اور باقاعدہ شکایت درج کرائی۔ ان کا دعویٰ ہے کہ ملزمان میں سے ایک شخص ماضی میں قتل کے مقدمہ میں سزا یافتہ رہا ہے اور اس وقت پیرول پر ہے۔ مندر کے منتظم اروِند شرما نے بیان دیا کہ مندر کی زمین پر کسی دوسرے مذہب سے متعلق سرگرمی برداشت نہیں کی جائے گی، خواہ ان کے خلاف مقدمہ ہی کیوں نہ درج کر لیا جائے۔
ویڈیو دیکھنے کےلئے لنک پر کلک کریں:
https://x.com/i/status/2026644900448465361
پولیس حکام نے موقع پر پہنچ کر دونوں برادریوں سے امن و امان برقرار رکھنے کی اپیل کی ہے۔ شاہد کا طبی معائنہ کرایا گیا، اور پولیس کا کہنا ہے کہ شکایت کی بنیاد پر قانونی کارروائی کی جائے گی۔ میونسپل کونسلر پرویز قریشی نے واقعہ کو انتہائی سنگین قرار دیتے ہوئے کہا کہ کسی شخص پر حملہ ناقابلِ قبول ہے۔ اگر کسی کو اعتراض تھا تو انتظامیہ کو مطلع کیا جانا چاہیے تھا۔ انہوں نے غیر جانبدارانہ تحقیقات اور ملزمان کے خلاف سخت کارروائی کا مطالبہ کیا۔
