حیدرآباد (دکن فائلز) نیویارک کے میئر ظہران ممدانی نے ایک بیان میں برطانوی بادشاہ شاہ چارلس سوم کو مشورہ دیا ہے کہ وہ تاریخی کوہِ نور ہیرا ہندوستان کو واپس کریں۔ برونکس میں ایک پریس کانفرنس کے دوران ممدانی نے واضح کیا کہ وہ بادشاہ سے کسی نجی ملاقات کا ارادہ نہیں رکھتے اور ان کی ممکنہ ملاقات صرف نائن الیون حملے کی یادگار تقریب تک محدود ہوگی۔
تاہم جب ان سے سوال کیا گیا کہ اگر انہیں الگ سے بات کرنے کا موقع ملے تو وہ کیا کہیں گے، تو انہوں نے دوٹوک جواب دیا کہ وہ کوہِ نور کی واپسی کا مطالبہ کریں گے۔ کوہِ نور، جو دنیا کے مشہور ترین ہیروں میں شمار ہوتا ہے، 1840 کی دہائی میں برطانوی نوآبادیاتی دور میں برصغیر سے لیا گیا تھا اور بعد ازاں ملکہ وکٹوریہ کو پیش کیا گیا۔ یہ ہیرا آج بھی لندن کے ٹاور میں برطانوی شاہی جواہرات کا حصہ ہے۔
ممدانی، جو یوگنڈا میں پیدا ہوئے اور ہندوستانی نژاد خاندان سے تعلق رکھتے ہیں، نوآبادیاتی تاریخ پر تنقیدی مؤقف کے لیے جانے جاتے ہیں۔ ان کے بیان کے بعد ایک بار پھر کوہِ نور کی ملکیت پر عالمی سطح پر بحث تیز ہو گئی ہے، کیونکہ بھارت سمیت کئی ممالک ماضی میں بھی اس کی واپسی کا مطالبہ کر چکے ہیں۔
بعد ازاں 9/11 کی یادگار تقریب میں ممدانی اور شاہ چارلس کی مختصر ملاقات بھی ہوئی، تاہم برطانوی شاہی محل نے اس ملاقات کی تفصیلات پر تبصرہ کرنے سے گریز کیا، جبکہ ممدانی کے دفتر نے بھی گفتگو کی نوعیت واضح نہیں کی۔
