حیدرآباد (دکن فائلز) تلنگانہ میں راشن کارڈ رکھنے والے افراد کے لیے ایک اہم خوشخبری سامنے آئی ہے۔ ریاستی حکومت نے عوامی فلاح و بہبود کے تحت راشن نظام میں مزید بہتری لاتے ہوئے اب چاول اور چینی کے ساتھ ’جوار‘ بھی تقسیم کرنے کا فیصلہ کیا ہے۔
ڈپٹی چیف منسٹر بھٹی وکرامارکا نے ایک اہم اجلاس کے دوران اس فیصلے کا اعلان کیا۔ انہوں نے کہا کہ حکومت کسانوں سے براہِ راست جوار خرید کر اسے راشن دکانوں کے ذریعے غریب عوام تک پہنچائے گی، تاکہ ایک طرف کسانوں کو مناسب قیمت ملے اور دوسری طرف عوام کو غذائیت سے بھرپور اناج دستیاب ہو۔
حکومت کے مطابق، اگر ان اجناس کو کھلی منڈی میں نیلام کیا جائے تو اس کا زیادہ فائدہ درمیانی افراد (بروکرز) کو ہوتا ہے، جبکہ راشن نظام کے ذریعے تقسیم کرنے سے براہِ راست غریب طبقے کو فائدہ پہنچے گا۔ جوار نہ صرف غذائیت سے بھرپور ہے بلکہ صحت کے لیے بھی مفید سمجھا جاتا ہے۔
اجلاس میں یہ بھی فیصلہ کیا گیا کہ ریاست میں پیدا ہونے والی مکئی کو براہِ راست پولٹری فارمرز کو فراہم کیا جائے گا۔ اس کے علاوہ ایس سی، ایس ٹی اور اقلیتی طلبا کے گروکل اسکولوں میں بھی جوار اور مکئی کو غذائی پروگرام میں شامل کرنے کی ہدایت دی گئی ہے۔
حکومت نے یہ بھی واضح کیا کہ مرکزی تعاون نہ ہونے کے باعث یہ خریداری ریاستی فنڈز سے کی جائے گی۔ فی الحال مکئی کی خریداری شروع ہو چکی ہے جبکہ جوار کی خریداری بھی جلد شروع ہونے والی ہے۔ قابل ذکر ہے کہ آندھراپردیش میں پہلے ہی راشن دکانوں کے ذریعے جوار اور راگی کی تقسیم جاری ہے، جس سے متاثر ہو کر تلنگانہ حکومت نے بھی اسی طرز پر قدم اٹھایا ہے۔
