حیدرآباد (دکن فائلز) راجستھان کے جودھپور ضلع سے انسانیت کو جھنجھوڑ دینے والا ایک دل دہلا دینے والا واقعہ سامنے آیا ہے، جہاں دو سگی بہنوں نے مبینہ طور پر برسوں تک اجتماعی زیادتی، بلیک میلنگ اور ذہنی اذیت کا شکار رہنے کے بعد خودکشی کر لی۔ اس افسوسناک واقعہ نے پورے ملک میں غم و غصہ کی لہر دوڑا دی ہے۔
میڈیا رپورٹس کے مطابق دونوں بہنیں کافی عرصہ سے چند افراد کی جانب سے مبینہ جنسی استحصال اور بلیک میلنگ کا شکار تھیں۔ ملزمان ان کی تصاویر اور ویڈیوز کے ذریعے انہیں مسلسل دھمکاتے رہے، جس کے باعث دونوں شدید ذہنی دباؤ اور خوف میں زندگی گزار رہی تھیں۔
پولیس کے مطابق خودکشی سے قبل دونوں بہنوں نے ایک نوٹ بھی چھوڑا، جس میں بعض افراد پر سنگین الزامات عائد کیے گئے ہیں۔ ابتدائی تحقیقات میں انکشاف ہوا کہ متاثرہ بہنوں کو کئی برسوں تک ہراساں کیا جاتا رہا اور انہیں خاموش رہنے پر مجبور کیا جاتا تھا۔
اطلاعات کے مطابق معاملہ اس وقت منظر عام پر آیا جب خاندان کے افراد نے دونوں بہنوں کو مردہ حالت میں پایا۔ واقعہ کے بعد علاقے میں سنسنی پھیل گئی جبکہ اہل خانہ شدید صدمے میں ہیں۔ پولیس نے معاملہ کی تحقیقات شروع کر دی ہیں اور کئی مشتبہ افراد سے پوچھ گچھ کی جا رہی ہے۔ پولیس حکام کا کہنا ہے کہ ہر پہلو سے جانچ کی جا رہی ہے اور اگر اجتماعی زیادتی اور بلیک میلنگ کے الزامات ثابت ہوئے تو سخت کارروائی کی جائے گی۔
رپورٹس کے مطابق متاثرہ خاندان نے الزام لگایا ہے کہ بااثر افراد کی وجہ سے معاملہ طویل عرصہ تک دبایا گیا۔ اہل خانہ نے مطالبہ کیا ہے کہ خاطیوں کو جلد گرفتار کر کے سخت سزا دی جائے تاکہ متاثرہ بہنوں کو انصاف مل سکے۔
سماجی کارکنوں اور خواتین تنظیموں نے اس واقعہ پر شدید افسوس ظاہر کرتے ہوئے کہا کہ خواتین کے خلاف جرائم اور بلیک میلنگ کے بڑھتے واقعات تشویشناک ہیں۔ انہوں نے مطالبہ کیا کہ ایسے معاملات میں فوری قانونی کارروائی اور متاثرین کو نفسیاتی و قانونی مدد فراہم کی جائے۔
