حیدرآباد (دکن فائلز) اتر پردیش کے ضلع بریلی کے حافظ گنج علاقے میں محرم کے جلوس کو بدنام کرنے اور مسلمانوں کے خلاف نفرت پھیلانے کی مبینہ سازش بے نقاب ہوگئی۔ پولیس تحقیقات میں انکشاف ہوا ہے کہ دو ہندوتوا نظریات کے حامل افراد نے ایک کمسن بچے سے ’’پاکستان زندہ باد‘‘ کا نعرہ لگوا کر ویڈیو بنائی اور اسے سوشل میڈیا پر وائرل کر دیا تاکہ محرم جلوس میں شریک مسلمانوں کو بدنام کیا جا سکے۔
یہ معاملہ اس وقت سامنے آیا جب خائیکھیڑا گاؤں میں محرم کے جلوس کے دوران مبینہ طور پر پاکستان نواز نعرے لگانے کی ویڈیو سوشل میڈیا پر تیزی سے پھیل گئی، جس کے بعد مقامی مسلمانوں کے خلاف نفرت انگیز مہم شروع ہوگئی۔
تاہم پولیس کی ابتدائی تحقیقات میں معلوم ہوا کہ ویڈیو دراصل ایک منصوبہ بند سازش کا حصہ تھی۔ پولیس کے مطابق دو افراد نے بدنیتی کے ساتھ ایک بچے کو متنازع نعرہ لگانے پر آمادہ کیا، ویڈیو ریکارڈ کی اور پھر اسے سوشل میڈیا پر پھیلا دیا۔
سرکل آفیسر نلیش مشرا نے بتایا کہ واقعے کے سلسلے میں مقدمہ درج کر لیا گیا ہے اور دونوں ملزمان کو حراست میں لے لیا گیا ہے۔ انہوں نے کہا کہ مزید شواہد کی بنیاد پر قانونی کارروائی جاری رہے گی۔
مقامی رہائشی محمد رفیق نے بتایا کہ محرم کا جلوس روایتی ماتمی جلوس اور ڈھول تاشوں کے ساتھ نکالا جا رہا تھا، ایسے میں ویڈیو میں سنائی دینے والی آوازوں پر پہلے ہی شبہات پیدا ہو رہے تھے۔ ان کے مطابق پورا واقعہ مسلمانوں کو بدنام کرنے اور فرقہ وارانہ کشیدگی پیدا کرنے کی کوشش معلوم ہوتا ہے۔
دیہاتیوں کا کہنا ہے کہ مرکزی ملزم اندرا پال پہلے بھی علاقے میں فرقہ وارانہ ماحول خراب کرنے کی کوششوں میں ملوث رہا ہے۔ مقامی افراد کے مطابق عید میلاد النبیؐ کے جلوسوں کے دوران بھی بعض شرپسند عناصر کو زعفرانی جھنڈے لے کر بھیجا گیا تھا تاکہ اشتعال انگیزی کی جا سکے، تاہم مسلمانوں نے صبر و تحمل کا مظاہرہ کرتے ہوئے کسی ناخوشگوار واقعے کو جنم نہیں لینے دیا۔
پولیس نے بتایا کہ سوشل میڈیا پر ویڈیو پھیلانے اور اشتعال انگیز مواد شیئر کرنے والے اکاؤنٹس کی بھی نشاندہی کی جا رہی ہے۔ حکام نے عوام سے اپیل کی ہے کہ بغیر تصدیق کسی بھی ویڈیو یا پیغام کو آگے نہ بڑھائیں۔
تحقیقات جاری ہیں، تاہم پولیس نے واضح کیا ہے کہ وائرل ویڈیو محرم جلوس کا حصہ نہیں تھی بلکہ بعض افراد کی جانب سے مسلمانوں کو جھوٹے مقدمات میں پھنسانے اور فرقہ وارانہ نفرت بھڑکانے کی ایک دانستہ کوشش تھی۔
ویڈیو دیکھنے کےلئے لنک پر کلک کریں:
https://x.com/bareillypolice/status/2068996889815716020/video/1
