ٹیم انڈیا کا خواب چکناچور: آسٹریلیا نے ہندوستان کو شکست دیکر ورلڈ ٹیسٹ چیمپئن شپ جیت لی

ہندوستان کا آئی سی سی ٹرافی جیتنے کا خواب ایک بار پھر چکنا چور ہوگیا اور آسٹریلیا نے آئی سی سی ورلڈ ٹیسٹ چیمپئن شپ کا ٹائٹل اپنے نام کرلیا۔
آسٹریللیا نے آئی سی سی ورلڈ ٹیسٹ چیمپئن شپ کے فائنل میں ہندوستان کو 209 رنز سے شکست دیدی۔ لندن کے اوول گراؤنڈ میں کھیلے گئے ٹیسٹ چیمپئن شپ کے فائنل کے آخری روز ہندوستانی ٹیم 444 رنز کے ہدف کے تعاقب میں 234 رنز بناکر آؤٹ ہو گئی، ٹیسٹ کے آخری روز ٹیم انڈیا کی 7 وکٹیں صرف 70 رنز پر گر گئیں۔
ہندوستان کی جانب سے دوسری اننگز میں ویرات کوہلی 49 رنز بنا کر نمایاں رہے جبکہ اجنکیا رہانے نے 46 اور روہت شرما نے 43 رنز کی اننگز کھیلی۔ آسٹریلیا کی جانب سے ناتھن لیون نے دوسری اننگز میں چار شکار کیے جبکہ اسکاٹ بولینڈ نے 3 وکٹیں حاصل کیں، مچل اسٹارک نے دو اور پیٹ کمنز نے ایک کھلاڑی کو آؤٹ کیا۔
آسٹریلیا نے پہلی اننگز میں 469 رنز بنائے تھے جبکہ دوسری اننگز 8 وکٹ 270 رنز پر ڈیکلیئر کی تھی، بھارتی ٹیم پہلی اننگز میں 296 رنز بناکر آؤٹ ہو گئی تھی۔