حیدرآباد (دکن فائلز) مسلم طالب علم کو جمعیت علماء ہند (مولانا ارشد مدنی) نے گود لے لیا۔ اترپردیش کے مظفر نگر میں ایک خاتون اسکول ٹیچر کی ویڈیو وائرل ہوگئی جس میں وہ کلاس روم میں موجود طلبا کو اپنے ہم جماعت مسلم طالب علم کو زور سے تھپڑ مارنے کےلئے کہتی ہے۔ خاتون ٹیچر کی اس غیرانسانی اور متعصبانه حرکت کی بین الاقوامی سطح پر مذمت کی جارہی ہے۔ ملک میں بھی سیاسی رہنماؤں کے علاوہ عام لوگوں کی جانب سے بھی غم و غصہ کا اظہار کیا جارہا ہے۔
وہیں جمعیت علماء ہند نے ایک قدم آگے بڑھ کر مسلم طالب علم کی کفالت کی ذمہ داری لی ہے۔ جمعیت علماء ہند کے ایک وفد نے آج مسلم طالب علم کے گھر پہنچ کر ان کے والدین سے ملاقات کی اور 7 سالہ مسلم لڑکے کی زندگی بھر تعلیم کا مکمل خرچہ اٹھانے کا اعلان کیا۔
مولانا مکرم علی قاسمی کنوینر مقامی جمعیۃ کے ساتھ آئے وفد نے جمعیت علماء ہند کی جانب سے مسلم طالب علم کو گود لینے کا اعلان کیا اور ٹیچر کی حرکت کی سخت الفاظ میں مذمت کی۔ جمعیت علماء ہند کے وفد میں مقامی علمائے کرام و اراکین موجود تھے۔
