حیدرآباد (دکن فائلز) تلنگانہ بی جے پی کے صدر کشن ریڈی کو گرفتار کر لیا گیا ہے۔ کشن ریڈی جو حیدرآباد کے اندرا پارک دھرنا چوک پر بھوک ہڑتال پر بھیٹے تھے۔ آج شام پولیس نے انہیں حراست میں لے لیا۔ پولیس نے بی جے پی رہنما کو 13 ستمبر کی شام تک دھرنے کی اجازت دی تھی تاہم پولیس نے کشن ریڈی کو شام 6 بجے کے بعد یہاں سے جانے کےلئے کہا۔ لیکن کشن ریڈی نے ہڑتال ختم کرنے سے انکار کردیا۔
اس دوران پولس اور کشن ریڈی کے درمیان شدید بحث بھی ہوئی۔ بعد میں پولیس نے بی جے پی کارکنوں کو منتشر کرتے ہوئے کشن ریڈی کو گرفتار کرلیا۔ بی جے پی نے تلنگانہ میں انتخابات سے قبل جارحانہ انداز اختیار کیا ہے۔ اسی کے تحت بی جے پی کے ریاستی صدر اور مرکزی وزیر جی کشن ریڈی نے آج 24 گھنٹے کی بھوک ہڑتال شروع کی۔ اندرا پارک دھرنا چوک پر بے روزگاری کے خلاف یہ بھوک ہڑتال تھی۔ انہوں نے کے سی آر حکومت پر تنقید کرتے ہوئے نوجوانوں کو روزگار فراہم نہ کرنے کا الزام عائد کیا۔
