حیدرآباد (دکن فائلز) کولکاتا کی ایک عدالت نے بالی ووڈ اداکارہ زرین خان کے خلاف مبینہ دھوکہ دہی کے معاملے میں وارنٹ گرفتاری جاری کیا۔ میڈیا رپورٹ کے مطابق اداکارہ کے خلاف 2018 میں مقدمہ درج کیا گیا تھا، معاملے کے تفتیشی افسر نے سیالدہ کورٹ میں اداکارہ کے خلاف چارج شیٹ داخل کی۔
زرین خان نے اس معاملہ میں نہ تو ضمانت کی اپیل کی اور نہ ہی عدالت میں پیش ہوئیں۔ سماعت کے دوران بار بار غیر حاضری پر عدالت نے اداکارہ کے خلاف گرفتاری کا وارنٹ جاری کردیا۔ گرفتاری وارنٹ سے متعلق سوال پر زرین خان نے کہا کہ ’مجھے یقین ہے کہ اس میں کوئی سچائی نہیں ہے۔ میں بھی حیران ہوں اور اپنے وکیل کے ساتھ چیک کر رہی ہوں۔ اس کے بعد ہی میں آپ کو کچھ وضاحت دے سکوں گی، اس دوران آپ میرے پی آر سے بات کر سکتے ہیں‘۔
واضح رہے کہ بالی ووڈ اداکارہ پر ایک شو میں پرفارم کرنے کے رقم لینے کے باوجود شو میں پرفارم نہ کرنے کا الزام ہے۔ پولیس کے مطابق منتظمین میں سے ایک نے اداکارہ اور ان کے منیجر کے خلاف دھوکہ دہی کی تحریری شکایت درج کروائی تھی۔ دونوں کے خلاف ایف آئی آر درج کی گئی اور انہیں پوچھ گچھ کے لیے پیش ہونے کیلئے کہا گیا تھا۔
