حیدرآباد (دکن فائلز) سوئٹزرلینڈ کی پارلیمنٹ میں برقعہ پر پابندی کے لیے بل منظور کرلیا گیا۔ میڈیا رپورٹ کے مطابق سوئٹزرلینڈ میں دو سال قبل برقعہ پر پابندی کے لیے کرائے گئے ریفرنڈم میں 51 فیصد آبادی نے پابندی کے حق میں ووٹ دیا تھا جس کے بعد آج آئین سازی کا آخری مرحلہ بھی پورا کیا گیا۔
سوئٹزرلینڈ کے ایوان زیریں میں برقعہ پر پابندی کا بل پیش کیا گیا۔ 151 ارکان نے حمایت جب کہ صرف 29 نے بل کی مخالفت کی۔ بل منظور ہونے کے بعد اس قانون کی خلاف ورزی پر جرمانہ بھی عائد کیا جا سکے گا جو 1 ہزار فرانک یعنی ایک ہزار 116 ڈالر تک ہوسکتا ہے۔
برقعہ پر پابندی بل کی منظوری کے بعد اب عوامی مقامات اور نجی عمارتوں میں ناک، منہ اور آنکھوں کو ڈھانپنا جرم ہوگا تاہم کچھ صورتوں میں استثنیٰ بھی دیا جائے گا۔ یورپ میں برقع پر پابندی عائد کرنے والا سوئٹزرلینڈ تیسرا ملک ہے جب کہ اس سے قبل بیلجیئم اور فرانس ایسا کرچکے ہیں۔
