فرانس میں دارالحکومت کے میٹرو اسٹیشن پر ایک نقاب پوش خاتون نے اللہ اکبر کا نعرہ لگانے کے بعد مسافروں سے بلند آواز میں کہا کہ تم میں سے کوئی یہاں محفوظ نہیں ہے جس پر پولیس نے خاتون کو گولیوں کا نشانہ بنا ڈالا۔
بین الاقوامی میڈیا رپورٹس کے مطابق نقاب پوش خاتون نے زور زور سے اللہ اکبر کے نعرے لگائے اور خود کو دھماکے سے اُڑانے کی دھمکی بھی دی جس پر خوف زدہ مسافروں نے پولیس کو کال کردی۔ پولیس کا کہنا ہے کہ ایک گھنٹے تک خاتون کو گرفتاری دینے کے لیے مذاکرات کیے لیکن خاتون کے تعاون نہ کرنے پر مسافروں کی حفاظت اور اپنے دفاع میں مجبوراً ہمیں گولیاں چلانی پڑیں۔
پولیس فائرنگ میں خاتون کو 8 گولیاں لگیں جو زیادہ تر ان کے پیٹ پر لگیں۔ پولیس نے مزید بتایا کہ 38 سالہ خاتون کو 2021 میں بھی دھمکیاں دینے پر حراست میں لیا گیا تھا تاہم تفتیش کے دوران خاتون کے نفسیاتی امراض میں مبتلا ہونے کا پتہ چلا تھا۔ پولیس کا کہنا ہے کہ خاتون کو اُس وقت ماہر نفسیات کی خدمات بھی فراہم کی گئی تھیں۔
