حیدرآباد (دکن فائلز) اتراکھنڈ میں ہریدوار کے ہرکی پوڑی میں ایک مسلم شخص کو پولیس نے انڈے بیچنے کے الزام میں گرفتار کرلیا ہے۔ قومی آواز رپورٹ کے مطابق گرفتار کئے گئے شخص کا نام نظام الدین ہے اور اس کا تعلق یوپی کے شہر مراد آباد سے ہے۔
نظام الدین پر الزام ہے کہ وہ قانون کی خلاف ورزی کرتے ہوئے انڈے فروخت کر رہا تھا۔ یہ گرفتاری اس وقت عمل میں آئی جب کچھ لوگوں نے نظام الدین کو انڈوں کے 5 ٹرے اور ایک بوری کے ساتھ پکڑا اور پولیس کو اطلاع دی۔
تھانے انچارج سنجیو چوہان نے بتایا کہ ملزم کو انڈے بیچنے کے الزام میں حراست میں لے کر جیل بھیج دیا گیا۔ مقامی لوگوں کی اطلاع کے بعد کاروائی کی گئی۔
انڈے بیچنے کے الزام میں مسلم شخص کی گرفتاری کو لیکر سوشل میڈیا پر گرما گرم بحث جاری ہے۔ یوزرس نے نظام الدین کی گرفتاری پر سوال اٹھائے۔ سماجی کارکن نوید حامد نے سوال کیا کہ ’ہندوستان میں انڈے بیچنا کب سے جرم بن گیا؟ بی جے پی کی حکومت والی ریاست اتراکھنڈ کی پولیس نے ہریدوار میں ایک مسلمان بیچنے والے کو 5 کارٹن انڈے کے ساتھ گرفتار کیا۔ قومی انسانی حقوق کمیشن سے کسی کارروائی کی توقع نہیں کیونکہ انڈے بیچنے والا غریب مسلمان ہے۔‘
