حیدرآباد (دکن فائلز) ملک کے دارالحکومت دہلی میں 16 برس کے لڑکے نے ایک 17 سالہ نوجوان کو قتل کردیا جس کے بعد سی سی ٹی وی ویڈیو میں اُسے لاش کے پاس رقص کرتے ہوئے بھی دیکھا جا سکتا ہے۔ میڈیا رپورٹس کے مطابق لڑکے نے نوجوان پر متعدد بار چاقو سے حملہ کیا اور مبینہ طور پر اُس کی جیب سے 350 روپے لے کر فرار ہوگیا۔ یہ خوفناک واقعہ شہر کے شمال مشرقی علاقے میں پیش آیا۔
سی سی ٹی وی فوٹیج میں دیکھا جاسکتا ہے کہ قاتل نے مقتول پر متعدد بار چاقو سے حملہ کیا اور اس کی لاش پر چڑھ کر رقص کرتا رہا۔ پولیس نے قتل کی وجہ چوری بتائی ہے۔ قاتل نے پہلے مقتول کا گلا دبایا اور جب وہ بے ہوش ہوگیا تو اُس پر چاقو سے وار کیا۔ ویڈیو سے ایستا معلوم ہوتا ہے کہ دونوں ایک دوسرے سے واقف نہیں تھے۔ ویڈیو میں قاتل کو مقتول کی لاش ایک گلی میں گھسیٹے ہوئے بھی دیکھا جا سکتا ہے۔
نئی دہلی کے ڈپٹی کمشنر آف پولیس جوئے ترکے نے میڈیا کو بتایا کہ ’گذشتہ منگل کی رات 11 بجے کے قریب پولیس کو ایک فون کال موصول ہوئی کہ ایک 17 سالہ نوجوان کو ایک کم عمر لڑکے نے جنتا مزدور کالونی میں قتل کر دیا ہے۔‘ پولیس نے قاتل کو گرفتار کرلیا ہے اور 350 روپے بھی برآمد کرلیے جبکہ مقتول کی شناخت تاحال نہ ہو سکی ہے۔
اطلاعات کے مطابق قبل ازیں ملزم 2022 میں بھی ایک قتل کے مقدمے میں نامزد ہوا تھا اور وہ واقعہ بھی ڈکیتی پر مزاحمت پر پیش آیا تھا۔ ملزم کا تعلق اقلیتی طبقہ سے بتایا جارہا ہے۔
