امریکی ریاست کیلی فورنیا میں کورونا ایک مرتبہ پھر پھیلنے لگا، ہزاروں مریضوں کو ہسپتال داخل کروا دیا گیا۔ میڈیا رپورٹ کے مطابق کیلی فورنیا میں امریکی محکمہ صحت نے وارننگ جاری کی ہے کہ شہری کوویڈ 19 اور فلو سے بچاؤ کیلئے حفاظتی تدابیر اختیار کریں جن سے متاثرہ افراد کی تعداد میں اضافہ دیکھا گیا ہے۔
امریکا میں کورونا کے مریضوں کی تعداد میں دوبارہ تیزی سے اضافہ ہو رہا ہے اور اس نئی لہر نے مختلف ریاستوں کو کرسمس میں عوامی تقریبات کے پیش نظر پابندیوں سے متعلق غور کرنے پر مجبور کردیا ہے۔ بتایا گیا ہے کہ 9 دسمبر کے اختتام ہفتہ کے موقع پر 2 ہزار 449 مریضوں کو ہسپتالوں میں داخل کروایا گیا جو گزشتہ ماہ سے 40 فیصد زیادہ تعداد ہے۔
امریکی میڈیا کے مطابق کورونا کی تازہ لہر کی سب سے زیادہ شکار ریاست کیلی فورنیا ہوئی ہے۔ رواں ماہ کے پہلے ہفتے میں 2 ہزار سے زائد کیسز رپورٹ ہوئے تھے جس میں مزید تیزی آگئی ہے۔
یاد رہے کہ امریکہ میں ہر سال موسم سرما کے آغاز پر کورونا کیسز میں اضافہ ہورہا ہے لیکن اس سال گزشتہ برس کے مقابلے میں یہ شرح دو گنا زیادہ ہے جسے ماہرین نے تشویشناک قرار دیا ہے۔ تاہم محکمہ صحت کا یہ بھی کہنا ہے کہ اسپتال میں داخل افراد ویکسین شدہ ہیں، ان کی علامات معمولی نوعیت کی ہیں اور کسی کی جان کو خطرہ نہیں۔
