حیدرآباد (دکن فائلز) ایران حکومت نے ہندوستانی شہریوں کیلئے، ویزا کے بغیر اپنے یہاں دورہ کرنے کی پالیسی کو منظوری دے دی ہے۔ یہ پالیسی محض سیاحتی مقاصد کیلئے ہوگی۔اس چھوٹ کے ساتھ جن ہندوستانی شہریوں کے پاس عام پاسپورٹ ہے وہ ہرچھ ماہ بعد ایک بار، ویزا کے بغیر ایران جاسکیں گے اور وہاں زیادہ سے زیادہ پندرہ دن قیام کرسکیں گے۔ اگر ہندوستانی شہری اس سے زیادہ مدت تک رہنا چاہیں یا چھ مہینے کے اندر اندر کئی بار ایران جانا چاہیں یا انہیں کسی دوسری قسم کا ویزا درکار ہو تو اُن کیلئے لازمی ہوگا کہ وہ ہندوستانی میں ایران کی متعلقہ نمائندہ ایجنسی کے ذریعے ویزا حاصل کریں۔
ایرانی سفارت خانہ کا کہنا ہے کہ جو لوگ چھ مہینے کی مدت کے اندر ایک سے زیادہ بار ایران جانا چاہتے ہیں، انھیں ویزا حاصل کرنا ہوگا۔ بیان میں یہ بھی واضح کیا گیا ہے کہ بغیر ویزا داخلہ صرف ان ہندوستانی سیاحوں پر نافذ ہوگا جو ہوائی راستہ سے یعنی بذریعہ طیارہ ایران پہنچیں گے۔ ترکی، افغانستان، پاکستان یا کسی پڑوسی ملک سے ہو کر بری یا بحری راستہ سے ایران پہنچنے والوں کو بغیر ویزا کے داخل ہونے کی اجازت نہیں دی جائے گی۔ بہرحال، ایران اب تھائی لینڈ، ملیشیا، سری لنکا اور ویتنام جیسے ممالک کی فہرست میں شامل ہو گیا ہے جنھوں نے حال ہی میں ہندوستانی سیاحوں کے لیے ویزا کی ضرورت کو ختم کر دیا ہے۔
