حیدرآباد (دکن فائلز) سابقہ ٹینس اسٹار ثانیہ مرزا نے نماز کی اہمیت اجاگر کر کے سب کے دل ایک بار پھر جیت لیے۔ ثانیہ مرزا نے حیدر آباد میں ’دعوتِ رمضان‘ ایکسپو میں شرکت کی، جس کی میزبانی ان کی بہن انعم مرزا کر رہی ہیں۔ ثانیہ نے رمضان ایکسپو میں شریک ان کے مداحوں اور فالورز سے خطاب کرتے ہوئے نماز کی اہمیت بتائی۔ ان کا یہ ویڈیو سوشل میڈیا پر خوب وائرل ہورہا ہے۔
وائرل ہونے والی مذکورہ ویڈیو میں ثانیہ مرزا نے نماز کی اہمیت پر زور دیتے ہوئے کہا کہ ’نماز کی ادائیگی کو دیگر چیزوں پر ترجیح دیں۔ اس ویڈیو میں ثانیہ مرزا نے ’دعوتِ رمضان‘ کے شرکاء سے کہا کہ رمضان کا مزہ لینا ہے تو ’دعوتِ رمضان‘ سے بہتر اور کونسی جگہ ہو سکتی ہے، یہاں ضرور آئیں لیکن یہاں آنے سے پہلے اپنی نماز اور تراویح پڑھ کر آئیں اس سے پہلے یہاں مت آئیں‘۔
انہوں نے مزید کہا کہ جو نماز ادا کر کے نہیں آتے ان کے لیے یہاں بھی جگہ مختص کی گئی ہے اور جو تہجد ادا کرنا چاہتا ہے ان کے لیے بھی انتظام کیا گیا ہے۔ سوشل میڈیا پر وائرل ہونے والی اس ویڈیو نے صارفین کے دل جیت لیے اور ویڈیو کے کمنٹس میں تبصرہ کرتے ہوئے صارفین نے ثانیہ مرزا کی تعریفوں کے پل باندھ دیے۔
