حیدرآباد (دکن فائلز) معروف صحافی و روزنامہ سیاست کے نیوز ایڈیٹر عامر علی خان اور تلنگانہ جنا سمیتی کے صدر پروفیسر ایم کودنڈا رام نے آج تلنگانہ اسٹیٹ لیجسلیٹیو کونسل کے اراکین کی حیثیت سے حلف لے لیا۔ ان دونوں رہنماؤں کو پہلی بار جنوری میں نامزد کیا گیا تھا تاہم بی آر ایس کے لیڈر ڈی شراون اور ستیہ نارائنا کی درخواست کے بعد تلنگانہ ہائیکورٹ نے ان کی حلف برداری کو ملتوی کردیا تھا۔ انہوں نے عامر علی خان اور کودنڈا رام کو گورنر کے کوٹہ کے تحت نامزد کئے جانے کو چیلنج کیا تھا۔
واضح رہے کہ قبل ازیں بی آر ایس رہنماؤں نے سابق حکومت میں ان کی قانون ساز کونسل کےلئے نامزدگی کو گورنر کی جانب سے مسترد کئے جانے کو ہائیکورٹ میں چیلنج کیا تھا۔ ہائیکورٹ نے گورنر کے فیصلہ کو غلط بتاتے ہوئے موجودہ حکومت کی جانب سے کی گئی نامزدگی کو منسوخ کردیا تھا۔ 14 اگست کو سپریم کورٹ نے تلنگانہ ہائیکورٹ کے فیصلہ پر روک لگادی تھی، جس کے بعد عامر علی خان اور پروفیسر کودنڈا رام کی تقرری کی راہ ہموار ہونے کے بعد آج انہوں نے ایم ایل سی کی حثیت سے حلف لے لیا۔
