حیدرآباد (دکن فائلز) تلنگانہ حکومت کے مشیر محمد علی شبیر نے ریاستی اسمبلی کے اس متفقہ فیصلے کا خیرمقدم کیا ہے جس کے تحت “تلنگانہ ہیٹ اسپیچ اینڈ ہیٹ کرائمز (پریوینشن) بل 2026” کو مزید غور کے لیے سلیکٹ کمیٹی کے حوالے کر دیا گیا ہے۔ انہوں نے وزیر اعلیٰ ریونت ریڈی کو اس اقدام پر مبارکباد دیتے ہوئے اسے نفرت انگیز تقاریر کے خاتمے اور سماجی ہم آہنگی کے تحفظ کے لیے ایک جرات مندانہ قدم قرار دیا۔
انہوں نے کہا کہ ماضی میں صرف کانگریس حکومتوں نے ہی نفرت انگیز تقاریر کے خلاف مؤثر کارروائی کا مظاہرہ کیا ہے، اور کرناٹک کی مثال دیتے ہوئے کہا کہ تلنگانہ بھی اب اسی سمت میں پیش رفت کر رہا ہے۔
یہ بل، جو وزیر قانون سازی ڈی سریدھر بابو نے پیش کیا، نفرت انگیز تقاریر اور جرائم کے خلاف ایک جامع قانونی ڈھانچہ فراہم کرتا ہے۔ اس کے تحت کم از کم ایک سال سے لے کر سات سال تک قید اور 50 ہزار روپے جرمانہ تجویز کیا گیا ہے، جبکہ بار بار جرم کرنے والوں کے لیے دو سے دس سال قید اور ایک لاکھ روپے تک جرمانہ مقرر کیا گیا ہے۔ اس مجوزہ قانون کے تحت جرائم ناقابل ضمانت ہوں گے۔
شبر علی نے کہا کہ موجودہ قوانین نفرت انگیز تقاریر کی پیچیدہ نوعیت سے نمٹنے کے لیے ناکافی ہیں، اس لیے ایک مضبوط اور مخصوص قانون کی ضرورت ہے۔ انہوں نے مزید کہا کہ سلیکٹ کمیٹی کو بل بھیجنے سے اس پر تفصیلی بحث ممکن ہوگی اور حتمی قانون آئینی طور پر مضبوط اور مؤثر بنایا جا سکے گا۔
انہوں نے اس بات پر زور دیا کہ اگرچہ اظہارِ رائے کی آزادی Article 19(1)(a) کے تحت بنیادی حق ہے، تاہم Article 19(2) کے تحت عوامی نظم، اخلاقیات اور قومی سالمیت کے مفاد میں اس پر معقول پابندیاں عائد کی جا سکتی ہیں۔ انہوں نے کہا کہ مذہب اور شناخت کی بنیاد پر بڑھتی ہوئی نفرت انگیزی سماجی ہم آہنگی کے لیے خطرہ بن چکی ہے، اور اس کے تدارک کے لیے واضح قانونی مداخلت ضروری ہے۔
شبیر علی نے اپوزیشن کے خدشات کو مسترد کرتے ہوئے کہا کہ قانون کے غلط استعمال کو مناسب حفاظتی اقدامات کے ذریعے روکا جا سکتا ہے۔ شبر علی نے کہا کہ یہ قانون اقلیتوں اور کمزور طبقات میں اعتماد پیدا کرے گا اور جمہوری اداروں پر بھروسہ مضبوط کرے گا۔
