حیدرآباد (دکن فائلز) مہاراشٹر کی ابھرتی ہوئی سیاسی جماعت “اسلام پارٹی” (ISLAM) نے مراٹھواڑہ خطے میں اپنی سیاسی سرگرمیوں کو وسعت دینے کا اعلان کرتے ہوئے ناندیڑ میں ایک بڑے عوامی جلسے کے انعقاد کا فیصلہ کیا ہے۔ پارٹی قیادت کا کہنا ہے کہ جلسے کا مقصد خطے میں تنظیمی ڈھانچے کو مضبوط بنانا اور عوامی مسائل کو سیاسی ایجنڈے کا حصہ بنانا ہے۔
پارٹی کے بانی اور سابق رکن اسمبلی آصف شیخ نے کہا کہ مقامی بلدیاتی انتخابات اور حالیہ سیاسی تبدیلیوں کے بعد مراٹھواڑہ میں ایک نئی سیاسی قوت کی ضرورت محسوس کی جا رہی ہے۔ انہوں نے دعویٰ کیا کہ ان کی جماعت مذہبی بنیادوں پر نہیں بلکہ سماجی انصاف، تعلیم، روزگار اور بنیادی سہولتوں کے مسائل پر سیاست کرنا چاہتی ہے۔
اسلام پارٹی نے حالیہ عرصے میں مالیگاؤں کے بعد چھترپتی سمبھاجی نگر (اورنگ آباد) اور دیگر اضلاع میں اپنی تنظیمی سرگرمیاں بڑھائی ہیں۔ پارٹی کے مطابق ناندیڑ کا مجوزہ جلسہ مراٹھواڑہ میں اس کی توسیعی مہم کا اہم مرحلہ ہوگا، جس میں مختلف سماجی و سیاسی شخصیات کی شرکت متوقع ہے۔
سیاسی مبصرین کا ماننا ہے کہ مراٹھواڑہ میں اقلیتی ووٹوں کی سیاست کے تناظر میں اس نئی جماعت کی سرگرمیاں مستقبل میں علاقائی سیاسی منظرنامے پر اثر انداز ہو سکتی ہیں۔
