حیدرآباد (دکن فائلز) ترکی کے شہر استنبول میں منگل کے روز اس وقت شدید کشیدگی پیدا ہو گئی جب بند پڑے اسرائیلی قونصل خانے کے باہر مسلح افراد اور پولیس کے درمیان فائرنگ کا تبادلہ ہوا، جس کے نتیجے میں تین حملہ آور ہلاک جبکہ دو پولیس اہلکار معمولی زخمی ہو گئے۔
مقامی میڈیا کے مطابق یہ واقعہ استنبول کے بیسکتاس ضلع میں واقع قونصل خانے کی عمارت کے قریب پیش آیا۔ فائرنگ کے بعد علاقے میں سیکیورٹی سخت کر دی گئی اور پولیس کی بھاری نفری تعینات کر دی گئی۔
ترکی کے وزیر داخلہ مصطفیٰ سفٹس نے واقعے کی تصدیق کرتے ہوئے بتایا کہ پولیس کے ساتھ مسلح تصادم میں ملوث تینوں افراد کو ہلاک کر دیا گیا ہے۔ انہوں نے کہا کہ حملہ آوروں کی شناخت کر لی گئی ہے اور ابتدائی تحقیقات کے مطابق وہ ازمت سے ایک کرائے کی گاڑی کے ذریعے استنبول پہنچے تھے۔
وزیر داخلہ کے مطابق ہلاک ہونے والوں میں سے ایک کا تعلق ایک مذہبی شدت پسند تنظیم سے تھا، جبکہ دیگر دو افراد آپس میں بھائی تھے جن میں سے ایک کا ماضی میں منشیات کے مقدمے سے بھی تعلق رہا ہے۔
