حیدرآباد (دکن فائلز) رائل چیلنجرز بنگلورو نے آئی پی ایل 2026 کے فائنل میں گجرات ٹائٹنز کو پانچ وکٹوں سے شکست دے کر مسلسل دوسری بار ٹرافی اپنے نام کرلی۔ نریندر مودی اسٹیڈیم میں کھیلے گئے فائنل میں گجرات ٹائٹنز نے پہلے بیٹنگ کرتے ہوئے 155 رن بنائے، جواب میں آر سی بی نے 18 اوورز میں 5 وکٹوں کے نقصان پر 161 رن بناکر تاریخی کامیابی حاصل کی۔
اس جیت کے ہیرو وراٹ کوہلی رہے جنہوں نے 42 گیندوں پر ناقابل شکست 75 رن کی ذمہ دارانہ اور جارحانہ اننگز کھیلی۔ کوہلی نے ایک بار پھر ثابت کیا کہ بڑے مقابلوں میں ان کا تجربہ اور مزاج ٹیم کے لیے فیصلہ کن ثابت ہوتا ہے۔ انہوں نے آغاز ہی سے گجرات کے بولرز پر دباؤ بنایا اور آخری لمحہ تک کریز پر موجود رہتے ہوئے آر سی بی کو فتح دلائی۔
آر سی بی کے بولرز نے بھی فائنل میں شاندار کارکردگی دکھائی۔ گجرات کی مضبوط بیٹنگ لائن اپ کو 155 رن تک محدود کرنا میچ کا اہم موڑ ثابت ہوا۔ واشنگٹن سندر نے گجرات کی جانب سے نصف سنچری اسکور کی، لیکن دیگر بلے باز بڑی اننگز کھیلنے میں ناکام رہے۔
اس کامیابی کے ساتھ آر سی بی آئی پی ایل کی تاریخ میں مسلسل دو خطاب جیتنے والی اہم ٹیموں کی صف میں شامل ہوگئی۔ کپتان رجت پاٹیدار نے بھی ایم ایس دھونی اور روہت شرما جیسے کپتانوں کی فہرست میں جگہ بنالی جنہوں نے اپنی ٹیم کو خطاب کا دفاع کروایا۔
فائنل کے بعد آر سی بی کے مداحوں میں زبردست جوش و خروش دیکھا گیا۔ کوہلی اور انوشکا شرما کی جشن مناتی ویڈیو بھی سوشل میڈیا پر وائرل ہوگئی۔ آر سی بی کے لیے یہ جیت صرف ایک ٹرافی نہیں بلکہ برسوں کی جدوجہد، انتظار اور مداحوں کے جذبے کا خوبصورت نتیجہ قرار دی جارہی ہے۔
آر سی بی نے 155/8 کے جواب میں 161/5 بناکر فائنل جیتا، کوہلی 75 ناٹ آؤٹ رہے۔
