شوہر کے خرچ پر پڑھ لکھ کر افسر بننے کے بعد بیوی نے شوہر کو چھوڑ دیا

ایک خودغرض خاتون نے شوہر کے خرچ پر پڑھ لکھ کر اعلیٰ عہدے پر فائز ہونے کے بعد دوسرے شخص سے محبت ہونے پر شوہر کو ہی چھوڑ دیا۔ اطلاعات کے مطابق اترپردیش کے پریاگ راج سے تعلق رکھنے والی جیوتی موریا نے سب ڈویژنل مجسٹریٹ (ایس ڈی ایم) بننے کے بعد دوسرے شخص سے تعلقات استوار کرکے شوہر کو چھوڑ دیا۔
سوشل میڈیا پر بھی خاتون کی بیوفائی پر لوگ بحث کرتے دکھائی دیے اور کئی لوگوں نے اسے فلموں جیسی کہانی قرار دیا۔ خاتون کو شوہر نے خرچہ کرکے پڑھا لکھا کر افسر بنانے میں مدد کی اور ابتدائی طور پر خاتون شوہر اور گھر کے ساتھ مخلص بھی تھیں، تاہم بعد ازاں خاتون کے ناجائز تعلقات کا انکشاف ہونے پر خاتون نے شوہر کو ہی چھوڑ دیا۔
شوہر نے اہلیہ کو مشکل حالات کے باوجود پڑھایا لکھایا۔ خاتون نے پڑھ لکھ کر ریاستی پبلک سروس کمیشن کا امتحان دیا، جس میں انہوں نے ریاست بھر میں تیسری پوزیشن حاصل کی اور ایڈمنسٹریشن کے اعلیٰ عہدے پر فائز ہوئیں۔
جوڑے کے شادی 2010 میں ہوئی تھی اور ان کے ہاں 2015 میں جڑواں بیٹیوں کی پیدائش بھی ہوئی تھی، جس کے بعد خاتون جب ایس ڈی ایم بنیں تو پورے خاندان میں خوشیاں پھیل گئیں لیکن جلد ہی خاندان بکھر گیا۔ خاتون کے شوہر نے الزام عائد کیا کہ ان کی اہلیہ کے ایک افسر سے ناجائز تعلقات تھے اور دونوں کا کافی عرصے سے فیس بک پر رابطہ تھا۔ ایک دن ان کی بیوی کے فون میں ان کا فیس بک کھلا رہ گیا تو انہوں نے ان کے میسنجر میں جاکر نازیبا پیغامات دیکھے۔
شوہر کے مطابق بیوی کے ناجائز تعلقات کا علم ہونے پر بیوی ان پر آگ بگولہ ہوگئیں اور انہیں جیل بھجوانے کی دھمکی دی اور بعد ازاں بیوی نے ان پر جہیز خوری کا الزام لگا کر انہیں پھنسانے کی کوشش کی۔ شوہر کے مطابق انہوں نے بیوی کو مشکل حالات میں پڑھا لکھا کر بڑے عہدے پر پہنچایا لیکن اسی خاتون نے دوسرے مرد کے لیے انہیں چھوڑا۔ شوہر نے دعویٰ کیا کہ انہوں نے بیوی کو دوسرے مرد سے تعلقات ختم کرنے کا کہا، جس پر بیوی نے طلاق لینے سمیت ان پر مقدمات بنانے کی دھمکیاں دیں۔