حیدرآباد میں آسمان پر قوس قزح کے رنگ بکھر گئے، بچے خوشی سے جھوم اٹھے (جانئے قوس قزح کی حقیقت)

حیدرآباد کے مختلف علاقوں میں آج شام انتہائی دلکش منظر دیکھا گیا۔ آج شام غروب آفتاب کے وقت آسمان پر قوس قزح کا خوبصورت منظر دیکھا گیا۔ خاصکر چھوٹے بچوں نے اس منظر کا حیرت سے مشاہدہ کیا اور خوشی سے جھوم اٹھے۔ شہریوں نے اپنے موبائیل فونز میں اس دلکش و خوبصورت منظر کو قید کرلیا۔
آج حیدرآباد کے کئی علاقوں میں بارش ہوئی اور شام کے وقت حیدرآباد میں قوس و قزح کے دلکش رنگ آسمان پر بکھرے دکھائی دیے۔
ماہرین کے مطابق قوس قزح یا دھنک میں سبز، پیلا، گہرا نیلا، جامنی، نیلا، سرخ سمیت سات رنگوں کی کمان بن جاتی ہے، دھنک اس وقت بنتی ہے جب سورج کی روشنی کی شعاع پانی کے ایک قطرے میں داخل ہوتی ہے یہ قطرہ مثلثی انداز میں کام کرتا ہے۔ پانی کے قطرے میں داخل ہونے کے بعد یہ شعاع مڑتی ہے، قطرے کے آخر میں پہنچ کر یہ شعاع منعکس ہوتی ہے اور واپس مڑتی ہے قطرے سے باہر نکل کر دوبارہ مڑتی ہے اور سات رنگوں ميں تبدیل ہو جاتی ہے۔