ٹیم انڈیا کے فاسٹ بولر محمد شامی نے کار سمیت کھائی میں گرنے والے شخص کی جان بچا لی ہے۔ محمد شامی نے انسٹاگرام پر اپنی پوسٹ میں بتایا کہ نینی تال میں ایک شخص اپنی کار سمیت کھائی میں جا گرا جسے انہوں نے ریسکیو کیا۔
شامی اپنی پوسٹ میں لکھتے ہیں کہ ’یہ شخص بہت خوش قسمت ہے جسے خدا نے دوسری زندگی دی ہے۔ اس کی کار نینی تال میں میری گاڑی کے سامنے کھائی میں جا گری۔ ہم نے اسے بالکل بحفاظت باہر نکال لیا۔‘
محمد شامی نے حادثے کا شکار ہونے والے شخص کی جان بچانے پرخوشی کا اظہار کرتے ہوئے لکھا ’مجھے کسی کی جان بچا کر بہت خوشی ہو رہی ہے۔‘ ویڈیو میں دیکھا جا سکتا ہے کہ حادثے کا شکار ہونے والے شخص کو محمد شامی ابتدائی طبی امداد بھی دے رہے ہیں۔
