(ایجنسیز) کلکتہ ہائی کورٹ نے مغربی بنگال میں 2010 کے بعد سے جاری تمام او بی سی سرٹیفکیٹس کو رد کرنے کا حکم دیا ہے۔ جج تپبرت چکرورتی اور راج شیکھر منتھا کی ڈویژن بنچ نے بدھ کو او بی سی سرٹیفکیٹ دینے کے عمل کو چیلنج کرنے والی مفاد عامہ کی ایک درخواست پر سماعت کے بعد یہ فیصلہ دیا ہے۔
کلکتہ ہائی کورٹ کے فیصلے سے مغربی بنگال میں 77 مسلم ذاتوں کا او بی سی درجہ ختم ہوگیا۔ عدالت کے فیصلے پر سی ایم ممتا بنرجی نے بھی اپنا ردعمل دیا ہے۔ عدالت کے اس فیصلے کے بارے میں ممتا بنرجی نے کہا ہے کہ وہ او بی سی کا درجہ اور او بی سی سرٹیفکیٹ منسوخ کرنے کے عدالت کے فیصلے کو قبول نہیں کریں گی۔
عین لوک سبھا انتخابات کے درمیان کلکتہ ہائی کورٹ کی جانب سے ایسا فیصلہ سنایا گیا جس سے مغربی بنگال میں 77 پسماندہ مسلم ذاتوں سے تعلق رکھنے والے 5 لاکھ لوگوں کو نقصان ہوگا۔ ہائی کورٹ نے اپریل 2010 سے ستمبر 2010 تک او بی سی کے تحت مسلمانوں کی 77 ذاتوں کو دیے گئے ریزرویشن اور 2012 کے قانون کے مطابق ان کے لیے بنائے گئے 37 زمروں کو بھی منسوخ کر دیا ہے۔ جسٹس تپبرت چکرورتی اور راج شیکھر منتھا کی بنچ نے یہ بھی کہا کہ جن امیدواروں کو ان سرٹیفکیٹس کے ذریعے پہلے ہی موقع مل چکا ہے وہ اس فیصلے سے متاثر نہیں ہوں گے۔
