حیدرآباد (دکن فائلز) شہر حیدرآباد کے معروف اور مشہور مشائخ گھرانے کی علمی و روحانی شخصیت، سلسلہ عیدروسیہ کے جانشین مولانا حبیب مجتبی بن عیدروسیہ جعفر بن احمد العیدروس العلوی الحسینی نے آج 28 اکتوبر بروز منگل مختصر سی علالت کے بعد داعی اجل کو لبیک کہا۔
مولانا حبیب مجتبی بن عیدروسیہ جعفر بن احمد العیدروس العلوی احسینی کے وصال کی خبر عام ہوتے ہی عقیدتمندان میں سوگواری کی لہر دوڑ گئی اور آخری دیدار کے لئے مریدین و معتقدین جوق در جوق بیت العیدروس پہنچنا شروع ہو گئے۔
مولانا حبیب مجتبی بن جعفر العید روس کی نماز جنازہ آج 28 اکتوبر بروز منگل بعد نماز عشاء (8:15 بجے) مکہ مسجد چارمینار حیدر آباد میں ادا کی جائے گی اور تدفین بارگاہ عیدروسیہ، درگاہ خطہ صالحین، دارالسلام روڈ، نامپلی، حیدر آباد میں عمل میں آئے گی۔
وصال کی اطلاع عام ہونے کے بعد مختلف ممالک سے خبر کی تصدیق کے لئے فون کالز کا لامتناہی سلسلہ جاری ہے۔ آپ اپنے دادا حبیب عیدروس بن حسین العیدروس العلوی الحسینی رحمۃ اللہ علیہ کے روحانی فیض کے امین صوفی بالصفا تھے۔ آپ کی وفات پر علماء کرام، مشائخ عظام اور ذی اثر اصحاب نے تعزیت کا اظہار کیا۔
