حیدرآباد (دکن فائلز) شاعر مشرق اور بر صغیر کے شہرۂ آفاق عظیم مفکر ڈاکٹر علامہ محمد اقبال کا 148 واں یوم پیدائش آج پوری اردو دنیا میں انتہائی جوش و خروش کے ساتھ منایا جا رہا ہے۔ اس موقع پر مختلف جماعتوں، اداروں، علمی و ادبی تنظیموں، تعلیمی اداروں اور سماجی انجمنوں کی جانب سے دنیا کے مختلف علاقوں میں خصوصی تقریبات، سیمینارز، مذاکرے، مشاعرے اور کلامِ اقبال کے پروگرام منعقد کیے جارہے ہیں، جن میں علامہ اقبال کو زبردست خراجِ عقیدت پیش کیا جارہا ہے۔
شاعر مشرق علامہ محمد اقبال 9 نومبر 1877 کو پاکستان کے سیالکوٹ میں پیدا ہوئے۔ انہوں نے اپنے شاعرانہ کلام اور فلسفیانہ افکار کے ذریعے برصغیر کے مسلمانوں میں بیداری کی لہر پیدا کی اور خاص طور پر پیغمبر اسلامﷺ کی محبت کے چراغ کو مسلمانوں کے دلوں میں روشن کیا۔ انہوں نے دین اور دنیا سے بے خبر ملتِ اسلامیہ کو نہ صرف جگایا بلکہ ایک نئی سمت عطا کی۔
9 نومبر 1877 کو سیالکوٹ میں آنکھ کھولنے والے علامہ محمد اقبال نے ابتدائی تعلیم اپنے آبائی شہر میں حاصل کی اور پھر لاہور کا رخ کیا، 1899 میں ایم اے کرنے کے بعد اورینٹل کالج میں شعبہ درس و تدریس سے وابستہ ہوگئے اور اس دوران شاعری بھی جاری رکھی۔
علامہ محمد اقبال نے 1910 میں جرمنی سے وطن واپسی کے بعد وکالت کے ساتھ سیاست میں بھی حصہ لینا شروع کیا اور اپنی شاعری کے ذریعے فکری اور سیاسی طور پر منتشر مسلمانوں کو خواب غفلت سے جگایا۔ وہ 21 اپریل 1938 کو لاہور میں اپنے خالق حقیقی سے جاملے۔
