حیدرآباد (دکن فائلز) حیدرآباد میں سردی کی شدت بتدریج بڑھتی جارہی ہے۔ گزشتہ تین دنوں سے رات کے اوقات میں درجہ حرارت میں نمایاں کمی ریکارڈ کی گئی ہے، جس کے باعث شہری سردی سے کانپنے پر مجبور ہیں۔ خاص طور پر صبح کے ابتدائی اوقات میں ٹھنڈی ہواؤں کا زور زیادہ محسوس کیا جارہا ہے۔
محکمہ موسمیات کے عہدیداروں کے مطابق ہفتہ کے روز شہر میں کم از کم درجہ حرارت 16 ڈگری سیلسیس ریکارڈ کیا گیا، جو معمول سے کم ہے۔ رات کے وقت بڑھتی ہوئی سردی نے عوام کو مشکلات میں ڈال دیا ہے جبکہ صبح کے وقت دھند اور اوس کا اثر بھی دیکھا جارہا ہے۔
شہر کے مرکزی علاقوں کے مقابلے میں نواحی علاقوں میں سردی کی شدت زیادہ پائی جارہی ہے۔ پٹن چیرو میں سب سے کم 14 ڈگری، دُندگل میں 15 ڈگری، حیات نگر میں 17 ڈگری، حکیْم پیٹ میں 17.1 ڈگری اور راجندر نگر میں 18 ڈگری درجہ حرارت ریکارڈ کیا گیا ہے۔
محکمہ موسمیات نے پیش گوئی کی ہے کہ آئندہ دنوں میں سردی کی شدت میں مزید اضافہ ہوسکتا ہے۔ شہریوں کو مشورہ دیا گیا ہے کہ رات کے اوقات میں احتیاطی تدابیر اختیار کریں، گرم لباس پہنیں اور خاص طور پر بچوں اور بزرگوں کو ٹھنڈی ہواؤں سے محفوظ رکھیں۔ حیدرآباد میں موسم سرما کی ابتدا نے ہی سرد ہواؤں کا سخت احساس دلانا شروع کردیا ہے۔
