حیدرآباد (دکن فائلز) دنیا بھر میں اپنی خوشبو، ذائقے اور شاہانہ ترکیب کے لیے مشہور حیدرآبادی بریانی نے ایک بار پھر عالمی سطح پر اپنی دھاک بٹھا دی۔ بین الاقوامی فوڈ گائیڈ TasteAtlas نے “دنیا کی بہترین چاول کی ڈشز 2025” کی فہرست جاری کی، جس میں حیدرآباد کی لاجواب بریانی 10ویں نمبر پر شامل ہوئی۔
یہ نہ صرف ٹاپ 10 میں شامل ہوئی بلکہ ٹاپ 50 میں آنے والی واحد ہندوستانی ڈش بھی قرار پائی، یہ بات ہر حیدرآبادی کے لیے فخر اور خوشی کا باعث ہے۔
TasteAtlas نے یہ رینکنگ دنیا بھر کے ماہر شیفس، فوڈ کریٹکس اور لاکھوں ٹریولرز کی ریٹنگز کی بنیاد پر مرتب کی۔ ہندوستان میں لکھنوی، کولکاتہ اور کشمیری بریانیوں کا اپنا مقام ہے، لیکن حیدرآباد کی بریانی نے سب کو پیچھے چھوڑتے ہوئے عالمی درجہ بندی میں سبقت حاصل کی۔
اس فہرست میں جاپانی ڈشز کی برتری برقرار رہی، جہاں نگیٹورودون، سوشی اور کائیسینڈون ٹاپ 3 میں رہیں۔ اس کے باوجود حیدرآبادی بریانی کا ٹاپ 10 میں جگہ بنانا، وہ بھی بڑے سخت عالمی مقابلے میں، ایک شاندار کارکردگی ہے۔
حیدرآباد کے لوگوں کے لیے یہ خبر ایک جشن سے کم نہیں۔ چارمینار کی گلیوں سے ہائی ٹیک سٹی تک، ہر جگہ بریانی نہ صرف ایک کھانا بلکہ ایک تہذیب اور شناخت ہے۔ یہ کامیابی ایک بار پھر ثابت کرتی ہے کہ حیدرآباد کی بریانی کا ذائقہ عالمی سطح پر بھی ناقابلِ فراموش ہے۔
