حیدرآباد (دکن فائلز) میڈیا رپورٹس اور ذرائع کے مطابق تلنگانہ میں دسویں جماعت کے سالانہ امتحانات 18 مارچ 2026 سے شروع ہونے کا امکان ظاہر کیا جارہا ہے۔ دوسری جانب فلکیاتی ماہرین اور رؤیت ہلال کمیٹیوں کے اندازوں کے مطابق ہندوستان میں عیدالفطر 20 مارچ کو ہونے کی توقع ہے۔
اسی تناظر میں والدین، سرپرستوں اور مختلف سماجی تنظیموں نے حکومتِ تلنگانہ اور محکمہ تعلیم سے یہ اپیل کی ہے کہ امتحانات کی تاریخوں کا ازسرِنو جائزہ لیا جائے اور سالانہ امتحانات کو عیدالفطر کے بعد منعقد کیا جائے، تاکہ طلبا کو ذہنی دباؤ اور عملی مشکلات سے بچایا جاسکے۔
والدین کا کہنا ہے کہ رمضان المبارک میں روزہ رکھنا ہر مسلمان پر فرض ہے اور دسویں جماعت کے مسلم طلبا کو روزے کی حالت میں امتحانات کے دباؤ سے مشکل ہوسکتی ہے، خصوصاً رمضان کے آخری ایام میں۔ مزید برآں عید کے قریب خریداری کے باعث شہر میں شدید ٹریفک جام رہتا ہے جس سے طلبا کو امتحانی مراکز تک پہنچنے میں مشکلات کا سامنا کرنا پڑسکتا ہے۔
سرپرستوں نے حکومت کو مشورہ دیا ہے کہ اگر امتحانات 22 مارچ یا اس کے بعد منعقد کئے جائیں تو طلبہ پوری یکسوئی اور سہولت کے ساتھ امتحانات دے سکیں گے۔ ان کا کہنا ہے کہ یہ تبدیلی نہ صرف مسلم طلبہ کے لیے معاون ثابت ہوگی بلکہ مجموعی طور پر امتحانی انتظامات بھی آسان اور بہتر انداز میں انجام دیے جاسکیں گے۔
والدین اور طلبہ نے امید ظاہر کی ہے کہ حکومت ان کے مطالبات پر مثبت غور کرے گی اور امتحانی شیڈول میں ایسی تبدیلی لائے گی جس سے تمام طلبا کو سہولت ہو۔
