واشنگٹن: امریکی صدر ڈونلڈ ٹرمپ نے ایک بار پھر اپنے منفرد انداز اور سوشل میڈیا سرگرمیوں کے ذریعے عالمی توجہ حاصل کر لی۔ صدر ٹرمپ نے اپنے سوشل میڈیا پلیٹ فارم ’’ٹروتھ سوشل‘‘ پر ایران کے نقشے کی ایک ایسی تصویر شیئر کی ہے جس میں امریکی جھنڈے کے رنگ نمایاں دکھائے گئے ہیں، جبکہ تصویر پر ’’United States of Middle East?‘‘ یعنی ’’مشرقِ وسطیٰ کی متحدہ امریکی ریاستیں؟‘‘ کا کیپشن درج ہے۔ اس جملے کے آخر میں سوالیہ نشان بھی شامل کیا گیا ہے جس نے سیاسی حلقوں میں کئی سوالات کھڑے کر دیے ہیں۔
صدر ٹرمپ کی اس پراسرار پوسٹ نے سوشل میڈیا پر زبردست بحث چھیڑ دی ہے۔ بعض صارفین اسے ایران اور امریکہ کے درمیان ممکنہ نئے تعلقات یا کسی بڑے سفارتی معاہدے کا اشارہ قرار دے رہے ہیں، جبکہ ناقدین کا کہنا ہے کہ یہ پوسٹ مشرقِ وسطیٰ میں امریکی اثر و رسوخ بڑھانے سے متعلق سیاسی پیغام بھی ہو سکتی ہے۔
یہ پوسٹ ایسے وقت سامنے آئی ہے جب عالمی میڈیا میں امریکہ اور ایران کے درمیان مذاکرات میں پیش رفت اور کسی ممکنہ معاہدے کی قیاس آرائیاں زور پکڑ رہی ہیں۔ ماہرین کے مطابق صدر ٹرمپ کی جانب سے ایران سے متعلق اس قسم کی علامتی پوسٹ ایک سفارتی اشارہ بھی سمجھی جا سکتی ہے، خصوصاً ایسے ماحول میں جب خطے میں کشیدگی کم کرنے کی کوششیں جاری ہیں۔
صدر ٹرمپ اس سے قبل بھی اپنے غیر روایتی سوشل میڈیا انداز کے باعث خبروں میں رہ چکے ہیں۔ حال ہی میں انہوں نے مصنوعی ذہانت (AI) کی مدد سے تیار کردہ ایک دلچسپ ویڈیو شیئر کی تھی جو دیکھتے ہی دیکھتے وائرل ہو گئی۔ اس ویڈیو میں ٹرمپ امریکی ٹی وی پروگرام ’’دی لیٹ شو‘‘ کے سیٹ پر اچانک داخل ہوتے ہیں اور میزبان اسٹیفن کولبرٹ کو اٹھا کر کچرے کے ڈبے میں پھینک دیتے ہیں۔
ویڈیو میں اس کے بعد صدر ٹرمپ اپنے پسندیدہ گانے Y.M.C.A. کی دھن پر مخصوص انداز میں رقص کرتے دکھائی دیتے ہیں۔ اس ویڈیو نے بھی سوشل میڈیا پر لاکھوں ویوز حاصل کیے تھے جبکہ حامیوں اور مخالفین کے درمیان نئی بحث چھیڑ دی تھی۔
سیاسی مبصرین کا کہنا ہے کہ صدر ٹرمپ سوشل میڈیا کو محض رابطے کا ذریعہ نہیں بلکہ ایک سیاسی ہتھیار کے طور پر استعمال کرتے ہیں، اور ان کی حالیہ پوسٹ بھی عالمی سیاست، ایران سے تعلقات اور امریکی خارجہ پالیسی کے تناظر میں خاص اہمیت اختیار کر چکی ہے۔
