گجرات کے پنچ محل کی عدالت نے 2002 فسادات کے ایک کیس میں جس میں دو معصوم بچوں سمیت 17 مسلمانوں کے قتل معاملہ کے 22 ملزمین کو بری کردیا۔
دفاعی وکیل گوپال سنگھ سولنکی نے کہا کہ ایڈیشنل سیشن جج ہرش ترویدی کی عدالت نے ثبوت کی کمی کے بعد تمام 22 ملزمین کو بردی کردیا جبکہ ان میں 8 کی موت مقدمہ کے دوران ہوچکی ہے۔
انہوں نے کہا کہ دیلول گاؤں میں فسادات کے دوران 17 مسلمانوں کو قتل کردیا گیا تھا جبکہ اس معاملہ میں ثبوت کی کمی کی وجہ سے تمام ملزمین کو بری کر دیا۔
وہیں استغاثہ کے مطابق 17 افراد کو فسادات کے دوران 28 فروری 2002 کو قتل کیا گیا تھا اور ان کی لاشوں کو ثبوت مٹانے کی نیت سے جلا دیا گیا تھا جس کے بعد قتل اور فسادات سے متعلق تعزیرات ہند (آئی پی سی) کی دفعات کے تحت ایف آئی آر درج کی گئی تھی۔ ایک اور پولیس انسپکٹر نے واقعہ کے تقریباً دو سال بعد ایک تازہ مقدمہ درج کیا اور فسادات میں ملوث ہونے کے الزام میں 22 افراد کو گرفتار کیا گیا تھا۔
سولنکی نے کہا کہ استغاثہ ملزمان کے خلاف خاطر خواہ ثبوت اکٹھا کرنے میں ناکام رہا اور یہاں تک کہ گواہ بھی مخالف ہو گئے۔ وکیل دفاع نے کہا کہ مقتولین کی لاشیں کبھی نہیں ملیں۔
پولیس نے ایک دریا کے کنارے سے ایک ویران جگہ سے ہڈیاں برآمد کیں لیکن وہ اتنی جلی ہوئی تھیں کہ مقتولین کی شناخت نہ ہوسکی۔
