کرناٹک کے وزیرتعلیم بی سی ناگیش نے ایک بار پھر حجاب سے متعلق اپنے کٹر موقف کا اعادہ کرتے ہوئے کہا کہ امتحانات میں حجاب پہننے پر پابندی برقرار رہے گی اور حجابی طالبات کو امتحانات میں شرکت کی اجازت نہیں دی جائے گی۔
ناگیش نے کہا کہ مسلم طالبات کو امتحان مراکز کے احاطہ تک ہی حجاب پہن کر جانے کی اجازت ہوگی لیکن امتحان کے کمرہ میں انہیں حجاب کو اتارنا ہوگا۔
قبل ازیں کچھ طالبات نے اس امید کا اظہار کیا تھا کہ انہیں حجاب پہن کر امتحان لکھنے کی اجازت دی جائے گی لیکن بی جے پی کی کرناٹک حکومت نے ایک بار پھر حجاب سے متعلق اپنے سخت موقف کا اعادہ کیا اور حجاب پہن کر امتحان لکھنے کی اجازت دینے سے انکار کردیا۔
وزیر تعلیم نے کہا کہ چونکہ حجاب معاملہ سپریم کورٹ میں زیر غور ہے اس لیے سالانہ امتحان کے دوران حجاب کی اجازت دینے کا سوال ہی پیدا نہیں ہوتا۔
واضح رہے کہ کچھ روز قبل مسلم طالبات نے اس معاملہ میں سپریم کورٹ کا دروازہ کھٹکھٹایا تھا اور حجاب پہن کر امتحانات میں شرکت کی اجازت دینے کی اپیل کی تھی جس پر سپریم کورٹ نے اس معاملہ میں جلد ہی فیصلہ سنانے کا تیقن دیا تھا۔
