سائبر کرائم سے جڑے واقعات میں روزبروز اضافہ ہوتا جارہا ہے جبکہ اس کا شکار مشہور شخصیات، سیاسی قائدین و دیگر اعلیٰ عہدیدار بھی ہورہے ہیں اور انہیں بھی لاکھوں روپئے کا دھوکہ دیا جارہا ہے۔
اطلاعات کے مطابق مشہور اداکارہ و سیاست داں نغمہ کو بھی آن لائین دھوکہ دہی کا سامنا کرنا پڑا ہے۔ ان کے اکاونٹس سے ایک لاکھ روپئے دھوکہ دہی کے ذریعہ نکال لئے گئے۔
تفصیلات میں بتایا گیا کہ نغمہ کے موبائیل پر ایک لنک بھیجا گیا جسے انہوں نے اتفاقی طور پر کلک کردیا، جس کے بعد ایک شخص نے انہیں فون کیا اور KYC اپ ڈیٹ کرنے کے لیے تفصیلات دینے کو کہا، نغمہ کو شک ہوگیا اور انہوں نے تفصیلات بتانے سے انکار کردیا تاہم دھوکہ بازوں نے ان کے اکاونٹس سے ایک لاکھ روپئے نکال لئے۔
نغمہ نے اس واقعہ کی پولیس سے شکایت کی۔ شکایت میں انہوں نے کہا کہ انہیں فون پر ایک پیغام بھیجا گیا جس کے ذریعہ ایک لنک بھی دی گئی۔ پولیس نے نغمہ کی شکایت پر مقدمہ درج کر لیا اور تحقیقات کا آغاز کردیا ہے۔
وہیں ایک اور اطلاع کے مطابق جس بنک میں نغمہ کا اکاونٹ ہے اسی بنک کے دیگر 80 صارفین کو بھی اسی طرح کا دھوکہ دیا گیا۔
نغمہ نے کہا کہ بدمعاشوں نے ان کے اکاونٹ کو انٹرنیٹ بینکنگ کے ذریعہ لاگ ان کیا اور پھر ایک بینیفشری اکاؤنٹ بنایا اور ایک لاکھ روپے ٹرانسفر کر دیے۔ انہوں نے کہا کہ اس وقت انہیں تقریباً 20 OTP موصول ہوئے تھے۔ انہوں نے کہا کہ ان کی قسمت اچھی تھی اور انہیں صرف ایک لاکھ روپے کا نقصان ہوا۔
