یوٹیوب سے کالا جادو سیکھ کر انسانی کھوپڑی کےلئے قتل کرنے والے ملزمان گرفتار

حیدرآباد (دکن فائلز) اترپردیش میں غازی آباد پولیس نے کالا جادو کےلئے انسانی کھوپڑی حاصل کرنے ایک شخص کو مبینہ طور پر قتل کرنے کے الزام میں 4 ملزمان کو گرفتار کرلیا۔ میڈیا رپورٹس کے مطابق ملزمان نے یہ بہیمانہ قتل 2 تانترکوں کے مشورہ پر کیا جنہوں نے ان کو ورغلایا کہ کالے جادو سے ان چاروں کو 50 کروڑ روپے مل جائیں گے۔

پولیس نے بتایا کہ ملزمان کا تعلق بہار سے ہے، جو دہلی میں ای-رکشہ ڈرائیور کے طور پر کام کرتے تھے۔ ان میں سے 2 دوستوں نے اپنے ایک دوست کو بتایا کہ انہوں نے یوٹیوب سے کالے جادو سیکھ لیا ہے جس کے لیے انسانی کھوپڑی کی ضرورت ہوتی ہے اور اگر وہ یہ کالا جادو کریں تو وہ کروڑپتی بن سکتے ہیں۔

گرفتار ملزمان کی شناخت 28 سالہ وکاس عرف پرماتما، نریندر، پون کمار اور پنکج کے نام سے ہوئی ہے، پولیس نے مقتول کی کھوپڑی اور تیز دھار آلہ قتل بھی برآمد کر لیا۔ یہ قتل جون 2024 میں کیا گیا تھا جب پولیس نے غازی آباد میں ایک نالے سے سر کٹی لاش برآمد کی تھی۔

تفتیش کے دوران انہوں نے انکشاف کیا کہ وکاس عرف پرماتما نامی شخص نے کسی بھی شخص کا قتل کرکے اس کی کھوپڑی لاکر دینے کیلئے اُن سے رابطہ کیا تھا تاکہ اسکی کھوپڑی کو کالے جادو کے لیے استعمال کیا جا سکے۔ پولیس کے مطابق اس قتل کا ماسٹر مائنڈ پرماتما ہے جس کے سر پر پولیس نے پہلے ہی 25 ہزار روپے کے انعام کا اعلان کر رکھا ہے۔

اپنا تبصرہ بھیجیں