حیدرآباد (دکن فائلز) خانہ پور میونسپلٹی میں چیئرپرسن کے انتخاب کو لے کر جاری سیاسی کشمکش بالآخر ختم ہو گئی اور بی جے پی کی امیدوار انکم مونیکا چیئرپرسن منتخب ہو گئیں۔ انہیں بی آر ایس کونسلرز کی حمایت حاصل ہوئی، جس کے نتیجے میں وہ اکثریت حاصل کرنے میں کامیاب رہیں۔
اتوار کو منعقدہ انتخاب میں سات کونسلرز نے مونیکا کے حق میں ووٹ دیا، جس کے بعد انتخابی افسر نے ان کی کامیابی کا اعلان کیا۔ اسی کے ساتھ بی آر ایس کے کونسلر شعیب کو نائب چیئرپرسن منتخب کیا گیا۔ میونسپلٹی میں کل 12 وارڈز ہیں، جن میں بی آر ایس اور بی جے پی نے چار، چار نشستیں جیتیں، جبکہ کانگریس کو تین اور ایک آزاد امیدوار کامیاب ہوا تھا۔
کانگریس کے ایم ایل اے ویدما بوجّو ایکس آفیشیو رکن ہونے کی وجہ سے پارٹی کی طاقت چار تک پہنچ گئی تھی، تاہم بدلتے سیاسی حالات میں بی آر ایس نے بی جے پی کی حمایت کر دی، جس سے اقتدار کا توازن بدل گیا۔
میونسپل چیئرپرسن کے انتخاب سے قبل خاناپور میں شدید سیاسی ہنگامہ آرائی دیکھنے میں آئی، جس کے باعث ہفتہ کو ہونے والا انتخاب ملتوی کرکے اتوار تک کے لیے ٹال دیا گیا۔ بی جے پی اور بی آر ایس کے کارکنوں نے اپنے امیدوار کی جیت کا اعلان کرنے کا مطالبہ کرتے ہوئے میونسپل دفتر کا گھیراؤ کیا، جس کے دوران پولیس اور کارکنوں کے درمیان جھڑپیں ہوئیں۔
صورتحال اس وقت مزید کشیدہ ہو گئی جب پولیس نے لاٹھی چارج کیا، جس کے بعد علاقے میں کشیدگی پھیل گئی۔ حکام نے حالات کو قابو میں کرنے کے لیے سخت سکیورٹی انتظامات کیے اور انتخاب کو اگلے دن تک مؤخر کر دیا۔
سیاسی ذرائع کے مطابق کسی بھی پارٹی کو واضح اکثریت حاصل نہ ہونے کے باعث جوڑ توڑ کی سیاست عروج پر تھی۔
