حیدرآباد (دکن فائلز) ترنمول کانگریس (ٹی ایم سی) کے قومی جنرل سکریٹری اور رکن پارلیمنٹ ابھیشیک بنرجی نے مغربی بنگال کے سونارپور علاقے میں اپنے اوپر ہونے والے حملے کو ایک منظم سازش قرار دیتے ہوئے بی جے پی پر سنگین الزامات عائد کیے ہیں۔
ابھیشیک بنرجی ہفتہ کے روز انتخابی تشدد کے متاثرین کے اہل خانہ سے ملاقات کے لیے سونارپور پہنچے تھے، جہاں احتجاجی مظاہرین نے ان کے قافلے پر انڈے، جوتے اور دیگر اشیا پھینکیں۔ بعض اطلاعات کے مطابق دھکم پیل کے دوران ان کی قمیض بھی پھٹ گئی جبکہ انہیں حفاظتی ہیلمٹ پہن کر وہاں سے نکالا گیا۔
واقعے کے بعد ابھیشیک بنرجی نے الزام لگایا کہ ان پر حملہ پہلے سے منصوبہ بند تھا اور انہیں قتل کرنے کی کوشش کی گئی۔ انہوں نے کہا کہ علاقے میں مناسب پولیس بندوبست نہ ہونا کئی سوالات کو جنم دیتا ہے۔
ٹی ایم سی سربراہ ممتا بنرجی نے بھی اس واقعے کی شدید مذمت کرتے ہوئے کہا کہ ریاست میں سیاسی تشدد ایک خطرناک رخ اختیار کر چکا ہے۔ ان کا کہنا تھا کہ اپوزیشن رہنماؤں کو نشانہ بنانا جمہوری اقدار کے منافی ہے۔
دوسری جانب بی جے پی نے ان الزامات کو مسترد کرتے ہوئے کہا ہے کہ پارٹی کا واقعے سے کوئی تعلق نہیں ہے۔ بی جے پی رہنماؤں کے مطابق مقامی عوام کی ناراضی اس احتجاج کا سبب بن سکتی ہے، تاہم کسی بھی قسم کے تشدد کی حمایت نہیں کی جا سکتی۔
پولیس نے واقعے کی تحقیقات شروع کر دی ہیں جبکہ سکیورٹی انتظامات کا بھی جائزہ لیا جا رہا ہے۔ سیاسی مبصرین کے مطابق اس واقعے کے بعد ریاست میں ٹی ایم سی اور بی جے پی کے درمیان محاذ آرائی مزید شدت اختیار کر سکتی ہے۔
