!حیدرآباد (دکن فائلز) دنیا کے مصروف ترین اور مشہور ترین سیاحتی مقامات میں شمار ہونے والے ٹائمز اسکوائر میں جمعرات کو اچانک فائرنگ کے واقعے سے خوف و ہراس پھیل گیا اور سینکڑوں افراد جان بچانے کے لیے ادھر اُدھر بھاگنے لگے۔
امریکی میڈیا رپورٹس کے مطابق فائرنگ اس وقت ہوئی جب علاقے میں بڑی تعداد میں سیاح اور مقامی شہری موجود تھے۔ گولی چلنے کی آواز سنتے ہی لوگوں میں شدید بھگدڑ مچ گئی اور متعدد افراد قریبی عمارتوں اور دکانوں میں پناہ لینے پر مجبور ہو گئے۔
پولیس حکام کے مطابق واقعے میں ایک شخص زخمی ہوا جسے فوری طور پر اسپتال منتقل کر دیا گیا۔ زخمی کی حالت خطرے سے باہر بتائی جا رہی ہے۔ پولیس نے جائے وقوعہ کو گھیرے میں لے کر تحقیقات شروع کر دی ہیں جبکہ حملہ آور یا حملہ آوروں کی تلاش جاری ہے۔
سوشل میڈیا پر گردش کرنے والی ویڈیوز میں دیکھا جا سکتا ہے کہ فائرنگ کی آواز سنتے ہی لوگ چیختے ہوئے سڑکوں سے بھاگ رہے ہیں جبکہ پولیس اہلکار فوری طور پر علاقے میں پہنچ کر صورتحال کو قابو میں لینے کی کوشش کرتے نظر آتے ہیں۔
ٹائمز اسکوائر نیویارک کا انتہائی مصروف تجارتی اور سیاحتی مرکز ہے جہاں روزانہ ہزاروں افراد آتے ہیں۔ ایسے حساس مقام پر فائرنگ کے واقعے نے ایک بار پھر امریکہ میں عوامی مقامات پر سکیورٹی اور اسلحہ قوانین کے حوالے سے بحث چھیڑ دی ہے۔
پولیس حکام کا کہنا ہے کہ واقعے کے تمام پہلوؤں کا جائزہ لیا جا رہا ہے اور سی سی ٹی وی فوٹیج کی مدد سے ملزمان کی شناخت کی کوشش جاری ہے۔ ابتدائی تحقیقات میں واقعے کے محرکات فوری طور پر سامنے نہیں آ سکے ہیں۔
